اليوم رح
نتابع الجزء التاني من سلسلة خبريات سرفيسية اللي رح يكون موضوعها عن ركاب السرفيس
وتفاعلن مع الشوفير ومع بعضن البعض .
راكب السرفيس هوي أي راكب، سواء كان لبناني
أو أجنبي بدو يتنقل من منطقة للثانية ضمن الأراضي اللبنانيه . هيدا المفهوم العام
لكلمة راكب السرفيس أما بلبنان فركاب السرفيس صارو من
عيلة السرفيس
ومن أهل البيت ومن أعز الأصحاب، لأن صار في
علاقة وطيدة نميت بين الشوفير وبين هالركاب اللي كل يوم بيبقوا واقفين كل واحد حد
بيتو بذات الوقت وإذ بشرف السرفيس.
التأهيل والترحيب من شيم اللبناني، فكيف إذا
كانو من بيت السرفيس.
أفراد هالعيلة بيشتاقو لبعض من يوم ليوم،
خاصةً بعد نهار الأحد، بحسو بفقدي عجيبه غريبه، ما شافو نصن التاني. بس هالفقدي في
من وراها تجميع خبريات على كل الجمعة، كيف بدن يتسايرو النسوان بالسيارة
إذا ما أخدوا نهار فرصة وراحوا لقوطو خبار
وكتبوها وحفظوها ليسمعوها بالسرفيس ؟
أول خبرية بتسمعها بالسرفيس نهار الإثنين
بتبلش بسؤالين كيف كين الويكند وشو أكلتو الأحد ؟
هون بتفلت الخبريات بالدور وما بتعود تلحق
وصفات أكل وتجغيل بطريقة صنع الاكل... وبكفو الخبريات على مدار الجمعة موزعة ما
بين الكسل وقلة الخلق عالشغل، يليها خبار الولاد ودرسن بيلحقا خبار عن الحموات
وكيف إنو في وحدي حماتها منكدتلا عيشتا ومش
طايقطا وإذ بيتعاطفو معا بالسرفيس وبقولولا :" الله يخلصك منا عبكير "
صبحية السرفيس منا حكي عالناشف، انما
النساوين بيعملو واجباتن عالأخر، لأن السرفيس بيتن التاني، فبجيبو معن ترمس
القهوي، وبصيرو مستعجلين يخلصوا الفنجان كرمال قارئة الفنجان تبصرلون، هيده
المخلوقة
اللي مصير الركاب بين اديها اللي ما بيزبط
نهارن إذا طلع فنجانن أسود.... "الله لا يقدر"
ومن قارئة الفنجان إلى قارئ الجريدة اللي
بحب يضطلع على أخبار البلد قبل ما يبلش نهارو، كما وإنو هوي معلق على الاخبار
السياسية... بهيك وضع مفضل إنو يكونو الموجودين من نفس اللون السياسي وإلا
العوض بسلامتكم!!
هالأجواء السرفيسية، لمن يرغب إنو ينتمي
إلها بدو يتوجه على أقرب نقطة بيقطع فيا سرفيس ويواصل هالعمليه يومياً، بظرف أسبوع
يعد منتسب ومنتمي لهالجماعة ويعطى لقب المتسرفس كما وإنو عندو الصلاحيه
الكاملة إنو ينزل ويطبوش الباب بقوي
والشوفير ع قلبو متل العسل وبرد بعبارة "فداك" ما تفوتوا هالفرصة عليكن
وانتسبوا!
هيده عينه من الركاب أما النوع الاخر،
منتابعن بجزء تالت..
