ولعاني بال ٢٠١٣

كل آخر السنة من كل سنة تتطاحش المطاعم والفنادق اللبنانية على التنافس، مين السهرة عندو رح تكون الأحلى، الأقوى والأكلس  لتستقطب اللبناني، الأجنبي واللي بحب يدفع مين ما كان يكون !

بتسير كل ما تقلب الإذاعات عالراديو ما بتسمع غير إعلانات عن سهرة رأس السنة بمطعم فلان وفندق علتان ولعاني بال ٢٠١٣  !

الشي الأكيد إنو فندق الخمس نجوم  اللي منزل الكواكب تغني عندو، ما في لزوم تسأل عن سعر البطاقة، لأن السعر بدو صاروخ معبا عملة خضراء لتقدر تدفع سعر العرض يلي بيشبه 

حالة مترقبي النجوم و الكواكب اللي بيسهرو كل الليل ناطرين شي كوكب ليقطع 30 ثانية وبسربو عالبيت، نجوم الفن بهالفنادق مفكرين حالن فوق الريح وهني بمجرد إنو

يسجلو حضورن بكونو عملو إنجاز، وتشكر ربا العالم إنو اجو أصلاً، لأن ما في لزوم يغنو حتى، حضورن وعنة صوتن عالمسرح بتكفي ليقبضو حقها!! و أصلاً هني ما جبرو حدا يجي وأصلاً هني ما فرقاني معن إذا العالم أنجء طلعلها حبة لحمه تاكلها رغم انن دافعين فوقن وتحتن ويمكن مدينين ليجو يسمعو عنة صوت فنانن المفضل، عفواً الكوكب الرهيب الفريد من نوعه !

أما المطاعم يلي فينا نسميها بي الفقير أو إذا بدكن يلي شاعرة بحال المواطن والديقة الصعبي  يلي عم بمر فيا، فهون الجو والأكل غير قصة!

يعني أول شي إسم المطعم بطمنك تسهر عندو "تاج البلوط" إسم رنان، فنان و آمن !

 المشروب مفتوح ( مضروب بالخل ومنقوع بزيت الزيتون ) والمازة مميزة ( كل أنواع الفاصوليا واللوبيه بالزيت والبطاطا المسلوقة ... ) الزلمي تعبان ع سفرتو، شو بدكن بهالحكي

تحيي سهرة رأس السنة الراقصة "زاحطة" (على اجريها و أيديها.... ) والفنان " عارف الألحان"  (  إنتبه: يمكن ما يكون عارف ولا لحن ! ) 

ملاحظة أخيرة: جميع النقليات مؤمنة على وج الصبح إلى كافة المستشفيات في لبنان والعالم الخارجي ( دير الصليب )

أما ما هو أسمى من كل السهرات والحفلات هو أن نتمنى لكم سهرة هنية، آمنة ولطيفة مع أحبابكم  وأن تكون سنة ٢٠١٣ ولعاني بالمحبة والتسامح وتكون صفحة جديدة ما فيها ولا تعجة، مجلدة متل كتاب المدرسه يلي مننبصت

في بأول نهار بالسنة الدراسية، إن شاء الله تعبو بهالكتاب كل الأماني اللي بتحبو تحققوها بال-٢٠١٣ لما تزهقوا من هالكتاب !

دمتم بخير!

سباق المطر

جميل أن تشهد في موسم الشتاء من كل سنة على سباق فريد من نوعه، طبيعي و"خلقة ربه " ألا وهو سباق المطر !

إنه لمشهد غريب ومفاجئ كيف عند إطلاق رصاصة الرعد تنطلق هذه الوفود المطرية بسرعة البرق وتتبارز فيما بينها لوصول نقطة النهاية، الأرض !

غير أبهة بالناس، السيارات، النفايات وبالضرر الذي يمكن أن يسببه هجومها العشوائي.

فرحت أتساءل عن الجوائز التي يمكن أن تمنح لمن يحرز المرتبة الأولى بجدارة! وإذا بي، ألقى الجواب بعد أن تعرفت على قطرة ماء من بين مليون قطرة، وقعت على وجهي في يوم عاصف لئيم، كنت كعادتي أتعرض فيه لرشق من المطر.

فراحت تبكي حزناً لارتطامها بي بدل وصولها للأرض مباشرة، إذ في هذه الحالة خسرت فرصة وصولها عبر جري المياه إلى البلاد الأوروبية وحصولها على جنسية أوروبية تؤمن لها ضمان الشيخوخة والرفاهية والدفئ في أيام الشتاء بدلاً من البهدلة في لبنان!

فتفاجأت بهذا الكلام واستنتجت  أن المطر بذاته، الغالب على كل اللبنانيين، مش طايق البهدلة عالطرقات اللبنانية بعز دين الشتاء !!!  

رسالة إلى.....

اليوم وعلى غير عادة، سنقرأ في "مقبلات" قصيدة كتبت بقلم "هاكوب كوكورليان " 

انها قصيدة صادقة وصريحة، عفوية و بسيطة، لا يطلب فيها إلا جواباً على سؤاله...

عندما اراك تطلين علي بابتسامتك        تعجز الكلمات عن وصف جمالك

واراك عند اوقات العمل والجدية          تكونين ايضاً جذابة وبهية

ستتأكدين من صدق مشاعري             لان كلماتي نابعة من قلبي

عيوني تعشق ان تراك                       واذني تعشق ان تسمعك

لماذا نعمل نحن في نفس المكان؟          ونعمل ايضاً في نفس الزمان؟

هل هذه مجرد صدفة؟                       ام ان وراءه معنى؟

اترك لك حرية الاجابة                      اما بالكلام او بالكتابة

لن اقول بعض الامور بالكتابة             لانها لن تتسع في هذه الرسالة

انني اعتقد ان مشاعرك نحوي             متقاربة ومتكاملة من مشاعري

ولكنني سأنتظر التأكيد منك                 وسيكون لنا لقاء وفقاً لجوابك

الدواء الفاشي

اربينا وكبرنا على فكرة ما في غير "الدواء الشافي" لوجع الراس، الزلاعيم، المغص، وغيرا وغيرا  من الأوجاع يلي ممكن تصيب أي شخص مستهدف بوقت معين، إنو يتعرض لهالنوع من المصايب اللي ممكن تتفجر  بجسم الإنسان  !!

ولكن، المصيبة الأكبر اللي بتلحق هيدا التعرض الغير متوقع والغاشم لصحة الإنسان، لما بيضطر إنو ياخد  دواء يخلي موسوس كل الوقت على صحتو، بدل ما يحسسو بالأمان!!

هذا الدواء الجديد، يعرف "بالدواء الفاشي" أهميتو إفشاء المرض داخل جسم الإنسان وجعلو يتغلغل في إلى درجة الهريان !!

كيف يعمل هذا "الدواء الفاشي" وكيف يتم إستعماله، وأين يتواجد، اليكم التالي:

لنعتبر انك أصبت بأبسط فيروس، متل الرشح وحكمك وجع رأس، لتداوي حالك سريعاً توجهت إلى أقرب فرمشيا ووصفلك دواء مع وصفه عن كيفية أخدو !!

أول طرقة بتتعرضلها، سعر  هيدا الدواء!!!

إنت وعم تدفع بتحس بوجع مؤلم بتفكر إنت إنو هيدا الفيروس، إنما بترجع لضميرك ولوعيك وبتعرف إنو سعرو عقصك براسك، بس شو فيك تعمل، أمرك الله!!

تاني طرقة بتتعرضلا، لما توصل على بيتك وتاخد أول حبه، وبتحس بطمأنينه وراحة، نوعاً ما شفاء، فبتقول شو هالدواء الفظيع، هات لشوف شو مكوناتو وإذ:

فوائد الدواء :

-هذا الدواء يقضي على  أوجاع الرأس والأسنان

( هون إنت بتنبسط، بتقول تمام، تنين بواحد، أنا أسناني بضلو يلمعو، خي، ما راح سعرو ضيعان هالدواء)

بتشعر لفترة انك شفيت إنما العوارض رح تزيد بمجرد انك تقرا :

العوارض الجانبية:

- غثيان

- صفيرة

- فقر دم 

- طفح جلدي 

- تورم 

- لعيان

-... وغيرها من الأمراض المزمنة...

لهون إنت بعدك منك مصدق إلى أن تقرأ :

ملاحظة:

رجاءً عدم أخذ الدواء!

( أنا بعد ما شفت هيك درجة من الصراحة)

للحظة، بصطل راسك، بتبلش تحس بالعوارض، بتقلب نفسك، بتطلع حرارتك ما بتعود تعرف شو عم بصير معك، بتصير منك مصدق أو بالأحرى ما بدك تصدق، وإذ بتطلع عالتليفزيون بتشوف وزير الصحة 

بتقول بقلبك بدو يطمنك بخبر 

وإذ هون الطرقة الثالثة:

أزمة الادوية المزورة في لبنان، مجموعة من الادوية تم اكتشافها وهي مزورة وغير صالحة للإستعمال بتاتاً !!

شو بدكن يصير بصديقنا المعتر؟؟

طب وفات بغيبوبه بدا حلم الله ليرجع يوعى منها!!  ( إذا وعي)

الحل الوحيد، نرجع ع لزقة الخبيزه وللأعشاب والزهورات، هيدا أقوى دواء!!

أي كلمي..؟

عبالي إكتب كلمي 

لشخص ساكن قلبي

بس مش عم لاقي الكلمي

اللي تخلي قلبو يحنلي  

بنظملو أشعار أو بكتبلو موال؟

ما هوي لو شو ما نقال

منو سامع غير القيل والقال

وكل اللي من قلبي نقال

سكر عليهن الباب وكلمة بخاطرك ما قال!

إنو يعني شو المطلوب؟

أرجوك حط ورقة واكتب

بقلمك أو بقلمي

شي كلمي، أي كلمي

لداوي فيها ألمك وألمي.

صوت وصورة

اشتقتلك صوت وصورة 

قلت بحطك بالصورة

مش حتى شوفك كل يوم

بس كرمال توضح عندك الصورة

مش همي شوف البرواز

وبداخلو صورة للذكرى

همي شوف صاحب الصورة

وشوف عيونو عم تضحك

ولا همي إسمع تسجيل

لصوت عمرو سنين 

همي إسمع صوت حنون 

كلماتو  كلها أشعار وفنون

فتفضل طلاع من هالصورة

وترجمها ادامي صوت وصورة

سجال القلب والعقل

أمعنت النظر في قلبي وإذا بملامحه غريبة ساخرة ومتعجبة!! فحاولت مناقشته عن سبب هذه الملامح فعقد حاجبيه وإنصرف عني !

فتعجبت من هذا التصرف، من قلب لطالما عرفت أسراره وتفاعلاته، أحزانه وأفراحه، أحلامه ومتطلباته، فرحت أفكر شاردة بما يمكن أن يكون قد سبب له هذا التجهم 

فتدخل عقلي مستأذناً مني خلوتي وقال لي: " أنا السبب " 

فنظرت إليه متسائلة، فاسترسل في الحديث وقال:" لطالما عقدنا إتفاقاً نحن الثلاثة أي أنا، أنت والقلب أن أخذ أي قرار مصيري أو عاطفي يعود لي ولي وحدي، إذ إني المحلل والناضج،

الواعي والعارف في مصلحة الوضع القائم والمسيطر على المشاعر الجياشة والمنفعلة الزائدة والغير مدروسة التي يبرزها القلب، أنا المسؤول عنكم وحاميكم في هكذا ظروف ومواقف 

أوليس هذا صحيحاً" ؟؟  فهززت رأسي مؤكدةً حديثه 

وتابع قائلاً :" إلى أن أتى يوماً وعصى القلب أوامري إذ لم يكن يقتنع بقراري النهائي الصارم والرافض قطعياً لم كان يبغيه ألا وهو تغيير نمط حياتنا من النظام إلى الفوضى، من الإستقرار إلى البهدلة،

من الأمان إلى الخطر... لايمكن أن أسمح له بجرفنا إلى هذا التيار الأعوج المجهول" !!

فتدخل القلب فجأة مهاجماً " لست الوحيد المثقف هنا وإن كان اعطاؤك أهمية في تقرير المصير وصوتاً للضمير، إذ إن مشاعري أصدق من تحاليلك ونبضات قلبي أخبر في مصيرنا إذ هي صوتي

ومرشدي وهي التي تضخ وتنبض لإعطائك الحياة"!

فصفن العقل محتاراً وجلست بجانبه متكئة ورأسي بأفكاره دواراً....

من يا ترى على حق ؟؟ لمن يجب الإصغاء ؟؟ إذ لكل منهما نمط حياة وقواعد ثابتة لا يمكن الإنحراف عنها !

ويل من صوت الضمير ويل من وجع القلب! صحيح أن ما يشتاق إليه القلب صعب تفسيره وما يبغيه لايمكن دائماً تلبيته إنما ما يمكن تأكيده هو أننا لا قدرة لنا بإقناعه!!

وهذه الحالة لا تختلف عن قرارات العقل التي تخطئ حيناً وتصيب حيناً أخر وفي كل الأحوال نتعرض إلى صوت الضمير المؤنب!

في النهاية لا يمكن الوصول بهذا السجال إلى نتيجة إنما إلى هدنة وسكون وتأمل، لسماع صوتاً بعيداً عالماً بالمصير  !!!

زمن الدواليب .... هويلو!!

عزيزي المواطن، أهلاً بك في لبنان، بلد الدواليب السوداء التي حلت مكان الأرز الأخضر 

رمز شعلة الدولاب أقوى من الأرزة الخضراء بوسط العلم اللبناني، النار غدارة وحراقة وإلها رهبة، شو هي الأرزة ادامها ؟!!

يعني بفضل الدواليب المشتعلة على مدار الأيام ومختلف الأوقات ( وذلك لتلبية متطلبات المواطنين وخدمتهم بشكل أفضل ) إعتمد البعض على إقامة "البربكيو" نهار الأحد أو السبت ليلاً، ويقوم بدعوة كل الموجودين

بالساحة على أحلى جلسة سكر، عاللبناني أكيد! ويتخلل الحفل عرض خاص من فرقة "طبلو وزمرلو" يليها فرقة "خبيط ولبيط" 

وما تتفاجأو من قوة النار وعلو دخانها إذ هي عم تساهم بنشر النور والبرود بعز دين الشوب وقطع الكهرباء بلبنان ( شو بدكن أحلى من هيك ؟)

النسيم العليل والعصافير المتزقزقة، تزقزقت وحدها وهربت على هالشوفة، والهوا قرف من ريحة ألدواليب وبعدنا نحن مطرحنا عم نعل........  

حروف ناقصة

http://www.almustaqbal.com/PDFVersionv4.aspx?
PDFType=asis&IssueNumber=4394&Pagenumber=10

"حروف ناقصة"  أضيفت على كلمات ومقالات في جريدة المستقبل اليوم !

زوروا الموقع أعلاه!

كاراج طبي

كاراج طبي!

صار في موضة جديدة بالمستشفيات وهي مع كل إجراء عملية جراحية، تجميلية أو ولادة، بتحصل على عملية تانيه تلقائياً، مدفوعة أكيد !!!

هالموضة اللي كاسحة العالم واللي ناتجة عن أخطاء تقنية تكتيكية استشفائية، عم بتأدي لخوف من المواطنين تجاه أي جسم طبي غريب أو قريب

إذ ما عاد حدا عم يعرف شو سر هالتهور أو هالفيروس اللي مسبب بطفيان في النافوخ الطبي!

(مع احترامنا الكامل إلى أصحاب الضمير والحكمة في هذا المجال)

إنت وفايت عالمستشفى لإجراء عملية أياً تكن بتحس حالك فايت على معمل أو شي كاراج بالمدينة الصناعية انما أكلس أكيد مع اضويه، مكيف، روائح معقمة وشراشف مهفهفة

(بس ما تنبسط كتير هول كلون قابضين حقن) كل هالديكور ما رح يخلينا ننسى إستخدام نفس المعدات بالمستشفى والكاراج.

يعني خلونا نبدا بالعملية على أصولا، أول خطوة إرتداء المريول الأزرق مع الكفوف المعقمة، هيدي التمثيلية هي ذاتها بتصير بالكاراج الفرق إنو هوليك معقمٍن بمطهر والكاراج معقمن بالشحم ( قلة فرق ) 

ثانيا بيحضر العفريت وبعفرتوك وبشلولك حركتك وما بتعود حاسس بشي ( نكزت إبرة شوف شو عملت فيك ) ببلش الشغل عليك يا معتر متلك متل أي سيارة وهون بتبدا العملية مع جردة المعدات وكترت المعلمين.

عندك مفتاح الشق مستعمل ليشقو قلبك، المنشار لكسر العضام (ما  بدنا ننسى الكاسك ع وجون كأنو عم بلحمو حديد) أكياس الدم  والمصل متلا متل الزيت والبنزين للسيارة يعني ما حدا

بيعرف يمكن دمنا مخلوط مع زيت سيارات ومش دريانين  (هني البنزين وعم برخو بالماي) منكفي جولات المعدات لنوصل لمفتاح الصليب يلي بفضلو بتطلع معمد من تحت ايدين! ما بدنا ننسى البراغي والعزقات اللي هني أصل المشكل

اللي عم بصير إنو من بعد إجراء عملية جراحية الطبيب عم ينسى عزقة، بنسى أو شأفة ورقة ويختم على جرح المريض وبقلو حمدلله ع سلامه!!

ما بتلاقي غير هالمريض المعتر بعد فترة فرطو فرماتو وزحط على أول نزلة وضل فايت من جديد عالمستشفى كرمال اغراض شخصية أو معدات طبية، من وراها عرف الطبيب سبب رجوع هالمريض لعندو

لأن لاحظ فقدان إحدى اغراضو فحزر عالسريع العلاج ( هيك بكون الطبيب ماهر، بيلقط عالطاير )  

أما النساء الجميلات اللي ما عم بأفو ولا عملية على شكلن طلعلون طبيب فهيم بالجمال ولمستو فاروطية، يعني حدادة بويا بيعجبو خاطركن، سيدتي الجميلة

انفك أعوج أو يحتوي على عضمة، ما بدا شي ضربة شاكوش مع حفة ورقة كزاز ورشة ورنيش بصير خلنج!!  وما تعتلي هم بيتوصى بالسعر (للحلوين) اللي متلك!

منوصل للطابق الاجمل بالمستشفى اللي هوي طابق الولادات، كلنا منفرح لولادة طفل حتى لو ما منعرفو ومنبارك ومندعيلو بالخير حتى لو منو قريب منا لأنو الأطفال هني نعمة وهدية من الله !

فتخايلو بنهار يكون في ست بدا تولد وبلشت بالمخاض بيجي طبيبا بقلا إذا فيكي تأجلي هالولادة اليوم لبكرا إنو مساقب عندي سهرة عرس ومضطر روح عليا ما بدي زعل مرتي

متلو متل المكانيكي اللي بيووعدك إنو إذا بتحط سيارتك بالتزبيط اليوم بتاخدا بكرا فبتزبط مشاريعك ومشاويرك  إنت على هيدا الأساس وإذ بتتفجأ نهار التسلم الموعود إنو سيارتك متل ما تركتا، بعدا !!

بقلك يا زلمي شغلي لفوق راسي!!

والقاسم المشترك الأساسي أيضاً بهالمهنتين إنو فاتورتن خيالية، بالحالتين في دين!! 

إن هذا المقال ينتقد كل من لا يلتزم بشروط وقوانين الصحة والأخلاق المهنية الطبية والاستشفائية إذ يمكن الإفراط والتلاعب والتخاذل بأي شيء إلا بصحة وسلامة إنسان!

كما اننا نود أن نوجه تحية إجلال وإكبار إلى كل الأطباء الشرفاء، والله يعطيكن الصحة والعافية !!

عزائم أخر زمن

شدو العزيمة يا أهل العزم والعزائم بس بليز ما تخنقونا فيا!

يعني أد ما صايرة العزيمة أو الدعوة أو العرض لغرض أو لتوصيلة، قوية وكتير فيا إصرار هالأيام صرنا عم نخجل وما عم نعرف وين بدنا نخبي وجنا من هالعالم الطيبة فعلاً !

العزيمة صارت مسرحية كوميدية، فيا مواقف طريفة ولحظات مبكية ومضحكة بذات الوقت!

يعني بيحتار الواحد شو بدو يقول أو كيف يتصرف إدام ظرف مثل إنو بس يوصل الواحد على

بيتو من بعد ما يكون ماشي شي ١٠٠ كلم وما مخلا سرفيس وباص وما مقفى ولا وسيلة نقل مش مستعملا وقاطع السند والهند، بيتلاقى بصديقو عباب البناية وبقلو صديقو بكل برادة:" ولووو طب ما قللي كنت جبتك معي ولو ليه ما بتحكي ؟ ما نحنا بذات الشغل و ذات البناية!

خلص بكرا إنت معي!

تاني يوم بيختفي الصديق الوفي!!

أما الظرف الثاني هوي لما مجموعة من أصحابك بكونو رايحين على شي سهرية وبقولولك إنو رايحين، انما ما بيعرضو عليك الروحة غير لما يكونو راجعين، يعني إنو  عالساعة

٤ الصبح بيبعتلك ميساج إنو : " يا مان وينك، تع سهار معنا شو بدك عزيمة؟ يلا بعد بتلحقنا شي نص ساعة وفالين ، ناطرينك " ( يا عيني عليكن يا مان )  

منوصل للظرف الثالث هوي دعوة العرس لما بكونو العازمين داعيين شخصين لمعازيم معينين  ، وتاني يوم العرس بعاتبوون ليه بس راحو شخصين وهني ١٠ أشخاص

ولو ما بتحبو  تفرحو معنا ؟؟

  

حلو الواحد يستهبل التاني بس مش هالقد، بصير هوي المهبول، يعني إسمحولنا فيا يا انتو اللي عم تتذاكو علينا بعزايمكون ونازلين فينا عرض خدمات متواصل ما موصل غير على نسيان لأشخاص متلكن!  

مجرم بس قلبو طيب

نظراً للطلب المتزايد لمعرفة المزيد عن شخصية  "أبو شبكة " الفريدة اللي تابعناها "بمقبلات" عبر مقالتان، اليوم رح نتطرق للجهة الإنسانية ونتعرف عالشخصية المتعاطفة

اللي مخبايي داخل هالمخلوق !!

صحيح إنو "أبو شبكة" بندوق بتعاطي مع العالم وصحيح إنو لئيم مع الاشخاص اللي بجربو يدعسولو بالخسات اللي صرلو سنين عم يتعب علين وصحيح إنو مجرم بتصدير بيعات بالملايين ( الله يزيدون، وعشرة بعيون الحاسدين ) ببعض الأوقات لأشخاص انجاء قادرة تمشي ع إجريا إلا إنو بيقنعن بأن هيدي البيعة بالذات رح تسكرلون ديونن حتى لو هي أيضاً  عبارة عن دين بس دين من نوع أخر بجمع مصاري ( أكيد ولا مرة سامعين بهيك نوع دين هيدا موجود بس عند "أبو شبكة" ) 

إلا إنو هوي من بعد هيك ضرب بيتعاطف مع الزبونات وبقول " عنجد حرام العالم "  ( بدكن أكتر من هيك قلب طيب؟)

كل هالفظائع بهالشخصية بتخبي وراها  شبكة مليانه محبة وتعاطف مع كل شخص قريب، غريب، أو حتى دخيل.

يعني القريب بيخدمو بعيونو، وبيعطي من قلبو مع حبة مسك ، والغريب بيخدمو على قد طلبو مع ترك مجال للمساعدة في أي وقت أخر ، أما الدخيل فمن بعد ما يبهدلو ويسمعو كل شي بقلبو، بيرجع بيتنازل وبيخدمو بالقصص اللي "أبو شبكة" عبالو يخدمو فيا غير هيك ما تبحثو بالموضوع ! ( بهيدي الحالة الوضع حساس شوي انما الخدمة موجودة )

وبقدر ما عندو خدع ومحتلة، إلا إنو تجاه بعض الأشخاص ما بيقبل على حالو ولا على ضميرو إنو يخدعن هوي وعارف إنو عارفين إنو عم بجرب يخدعن، لأن هوي ما بحب البقع السودا اللي ممكن تظهر بعلاقتو مع بعض الأشخاص

لأن مساحيق العالم كلو مش ممكن تزيلا . (هلق في حال هوليك ما كانو منتبهين، أكيد كان كفا بالخدعة ... )

بكل الأحوال ومتل ما مبين بالمقال  "أبو شبكة" أد ما يكون مجرم بضل قلبو طيب !!

الهبل العذري المتفلسف

نلتقي في أيامنا هذه بكثير من مرضى الهبل وقد سمي بالعذري المتفلسف إذ كلما كان المهبول صغير السن كلما كان هبله عذرياً ومتفلسفاً!

انها ظاهرة ليست بغريبة انما الغريب فيها أنها تنمو بشكل سريع ومتطور لدرجة أن العقل الواعي لا يقدر أن يستوعبها وتراه يتسائل مستفهماً، ماذا يحصل؟

يا أيها العقل السليم لا تستغرب ولا تجرب حتى أن تفكر أن الخطأ منك، بالعكس إنما أشكر ربك على سلامتك واحرص على أن تقصد أي مستوصف أو صيدلية  لتتطعم ضد هذا الوباء!

إذ لا تعلم في أي وقت أو ساعة أو حتى غفلة، يأتيك مهبول، مفعم بالهبل ويحاول بفضل عقله الأهبل أن يهبلك معه، بهبله! 

ويا أيها الأهالي الكرام الرجاء توقي الحذر الشديد على أولادكم وحمايتهم من أي وبرة هبل قد تمر عبر نسمة هواء، تؤدي حينها إلى أزمة هبل يصعب التخلص منها يكفينا هبل وهبلان ويكفينا ما نعيشه من علل الهبل. 

منعاً لتكاثر هذا المرض نرجو منكم قراءة كتب ومتابعة برامج تثقيفية ومحاورة ناس محنكين !

عشتم وعاش لبنان، خال من الهبلان! 

خبر أفكارو !

ضاع الديب بتيابو

شرد وتفركش بخيالو

إجا الكنار وغنالو

ضاع زيادة مقابيلو

قال هوي منو عاجبو

ومقضيا معلي حواجبو

وإذا رح يكفي على حالو

رح يكشطو تيابو

يا تعتيري ويا شحاري

إجاني خبر من أفكاري 

إني فلست وما بقالي 

غير بنطالي وكالساتي !

أحد الكبير

أحد الكبير هوي أكبر أحد بين إخواتو الأحادات، أنا شخصياً بتمنالو العمر كلو وانشالله منفرح منو  يا رب!

هالنهار أد منو كبير ما في نشاط غير ما العالم بتمارسو متل تفقيس البيض، أكل المعمول وتحضير موائد عرمرمية مش طبيعيه وأخرتا عاللبناني أرغيلة!

مسابقة تفقيس البيض بهالنهار بالذات حلوة كتير وبتفقس روس كتيرة في حال الخسارة : "إنو معقول جارنا الزمك بأخر الشارع، منزنخ عليه وكل يوم بياكلا مية حجرة ع راسو، وكلب الحي بضل يعضو بإجرو و (ب......)  بيربح بتفقيس 

البيض ؟؟    إيه لا ما حزر بكرا بفرجي تكبير الراس سنة الجايه ناويلو، بدي هندس بيضة ما حدا بيقدرلا بدي ربيا من هلأ !! "

هيدا التحدي سمعتوا من رئيس التفقيس الأزعر بحي "الفقس"  عمرو  ١٠ سنين، بس هوي من أول ما فقس من البيضة توجو رئيس إذ كانوا كلن دجاجات بالحي !

أما مسابقات النسوان بصنع المعمول وخلافاتن وشطارتن على بعض ولا أحلى 

مثلاً: إم فستق، عاملة ٥ كيلو معمول لوحدا على إيدا وطريقتها سرية وما بتعطيا لحدا  

أما إم جوز فكل سنه بتعزم الجيران عالسفرة لا يعملو معمول العيد سوا وكل ما يخلصو من بيت بينتقلو ع غير بيت ليساعدو بعض !

أخيراً منوصل لإم تمر قال هي ما إلا جلاده تعمل معمول متل كل سنه رح تطلب ديليفري معمول بفستق وبجوز بلا تمر لأن هالأخير منا وفيا وبدا تغير طعمة تما 

من بعد ما حضرنا الحلويات الأساسية لهالعيد الكبير ، منوصل للمائدة اللي كل منطقة عندا تقاليدا من ناحية تحضيرا

منهم بحضرو الغمة اللي فيا الفوارغ والكروش والبعض الاخر بحضر دجاج محشي وقسم بنزل كل أنواع المشاوي.

الملفت إنو بس نشوف كمية هالأكل الهائلة اللي نازلة قدامنا منفكر كأن صرلنا شي ٥٠ يوم محرومين الأكل أو ما شايفين هالأطعمة من قبل ويلي بضحك أكتر 

إنو ما حدا بقرب صوب الأكل الأساسي لأن المقبلات  كالعادة وين ما بتكون بتملي الراس والبطن !!

بالنهاية فصح مجيد، تفقيس بيض سعيد، معمول كريم  وصحتين للجميع!

حروف ناقصة

عم فتش عالكلمة تفتيش

بين الرفوف والشبابيك 

لعلو يطل شي حرف عن شي رف

أو تنش شي نقطة من شي نبريش

سطوري ما عم تملا

محتارة كلماتي من وين بدي لمها

وكلما عن كلمة عقلي يسأل

ما في حرف على بعضو عم يركب 

  كلماتي وحروفي ضايعين 

زعلانين وتعبانين

مشلوحٍين شمال ويمين 

يامين يصرخلن من بعيد 

ويردن على عقلي صافيين!

الباب الفريد

فتحت الدنيي بوابا

وع بوابا ألف صوت نادى

فتهت بعجقة بوابا

وضجت بصدى أصواتا

صار كل صوت يندهلي من بعيد

ويدعيني بلا مواعيد 

ويقلي كلو هيين ما في تعقيد

ما بدك غير تقولي أكيد

قلت لقلبي عالأكيد

عندك العنوان الوحيد

اللي رح يوصلني عالباب الفريد

وهيك عالأكيد بقول أكيد !  

يا حبيبي عال بي بي

علاقة حميمة جمعت بين هاتف ذكي، "حاطط اينشتاين بجيبتو"، وكتار من اللبنانيين الشباب خاصةً، فصارت تفاصيل حياتن كلها معلقة بمصران البي بي، إذا شي تكة بزيحو عيونن عنو بيفضا

راسن من البطارية، فبفضلو يبقو مشرجين دماغن على شاشة وفقسات أد الفقسة!!

قصص وخبريات كتيرة عن البي بي عم تداول بين الأفراد بالمجتمع، أبرزها إنو لولا البي بي ما وعيت من النوم، هوي وعاني !!!

"ياي ي ي ي شو رومنطيقي "!!

والأكتر من هيك رومنطيقية إنو صارت البنت أو الشاب عم بضيعو بكلمة بي بي. 

إنو بي بي قصدك حبيبي أو بي بي فون ؟؟ وبعدين بيجي سؤال مين بي بي وأديه صرلك بتعرفا؟؟

هالأسئلة والمواجهة عم بتأدي للإنفصال إذ دخلت الخيانة عالخط!

أما الشق الأخر من العشاق عم بفضلو يقعدو يحكو عالبي بي حتى هني وقاعدين حد بعضن لأن الغزل عبر البي بي مؤثر أكتر ومتخطى حدود الرومنطيقية!

أيضاً وأيضاً من فوائد البي بي إنو صار لهوة عند الشباب ضمن عجقة السير الفظيعة بلبنان، انتو مش ملاحظين ليه عم بتزيد العجقة وكتير كول نحنا؟ هيدا لأن العالم ملهية عالبي بي، فاقعين سكرة وسهرة من العمر

عالطريق وبنص دين العجقة عبر البي بي، هني بالفعل داخل سهرة فنية بتسوى مليون عجقة سير!!

يا حبيبي شو عم نتسلى!!

فكركن ليه عم نوقف عالإشارة الحمرا؟؟ كرمال نشيك البي بي ويا ريت عطول بتضلا حمرا!

أنا برأيي بهالحالة الدولة لازم تهدي كل مواطن لبناني بي بي ليمشي النظام، هيك بتأمن عالسلامة العامة ومن جهة تانية بتعبر عن حبها للمواطن !

انما أي حادث أعور أو غاشم ينتج جراء هذا التهور "البيبوي" تكون غير مسؤولة لذلك يرجى توخي الإنتباه والحذر من الأضرار الجسيمة الناتجة عن هذا الهاتف الذكي، كونو أذكى منو!!!