شو بقول الحكيم؟ سؤال مطروح من
كل الناس لدى مشاهد تن مريض أو حدا من أفراد عائلة المريض، يعني العالم ما عم
تكتفي فقط بسؤال كيف حال المريض ولكن عم تغوص
بالتفاصيل: شو بقول
الحكيم؟ يا لطيف شو هالإهتمام!!!!!
هيدا السؤال إلو كتير دلالات
وبتختلف نية السؤال حسب نية الشخص وطباعه، يدل هالسؤال عند البعض على
الحشرية، البعض الأخر: واجبات والبعض الأخر ويللي هني أقلية إهتمام بصحة
المريض
لنبدا بالناس اللي درجة
الحشرية عندن قاطعة المحيط ومتخطايه أعلى قمة بالعالم، أي شي
بيلمحو الشخص المريض أو حدا من أفراد عائلته طل، وإذ بتهل الأسئلة
عليه المعتر، لحد ما يزيدو المرض عالمريض ويلي بعد فيو شوية صحة
يعملولو كريزا. يعني من جملة
الأسئلة وأكيد من بعد شو بقول الحكيم؟- عم بنام بالليل؟ عضهرو أو ع بطنو ؟-
عم ياكول؟ بالشوكة أو بالملعقة ؟- كم مرة بفوت عالحمام؟ لوحدو أو معو حدا ؟- (شو
هالوقاحة ولو.... )
وبتخلص المقابلة معن بالله
ينجينا
أما أصحاب الواجبات اللي بيسألو
السؤال من باب تسميع القصيدة متل : كيفك؟ كيف صحتك ؟ كيف عايلتك؟ وإذ
بيتذكرو إنو هالشخص مريض فبيخطر عبالن سؤال : بعدك مريض؟ في أمل تصح؟ شو
بقول الحكيم؟
و بتخلص المقابلة : يلا الله
يقويك وبطبشلو ع كتفو "إنو روح يا كبير إنت" ( فعلاً
الله يقوي على هالمساطر اللي بشوفا كل يوم يعني هوي بمرضو مش مخلص بعد ناقصو
ناس على هالشكل)
أما الأشخاص يلي فعلاً مهتمين
بصحة المريض ويلي هني فعلاً بيكتفو بسؤال كيف الصحة ؟ يعني بيتركو الحرية
للشخص اللي قدامهن، المريض أو حدا من أفراد عائلته، يحكو على أد ما
قادرين يحكو
بالموضوع يمكن يحكو كتير ويمكن
يحكو قليل ولكن التعاطف يللي بيلمسو من هالشخص هو أكتر من مليون سؤال تلقوا من
أشخاص قبلو ....
وبتخلص المقابلة معن بالله كبير،
قادر وحكيم
بالمختصر، الحكيم بقول:"
ريحونا من اسئلتكم بيرتاح المريض وأهل المريض"!!
