شو عاملين ع رأس السنه؟

شو عاملين ع رأس السنه؟

سؤال بديهي ودارج بكعب كل سنه!

من بعد هالسؤال بتبلش المفاوضات والاجتماعات والمشاورات والشريعة عن:

. وين السهرة: بيت ، شاليه بفاريا أو بالكازينو!

. شو الأكل والمقبلات والمونو الأساسي  والأهم منهول كلن المشروب ( لأن الليله يا معلم بدنا نولعا)

. ومين الأشخاص اللي لازم يكونوا بالغروب

هالأسئلة بتشكل مصدر جدل عند المجموعة، يعني بما يختص بمكان السهرة في عندك اللي البودجيه ما بيسمحلو يدفع بالكازينو بصير ينزل شوي شوي، بالمناقشات والمحادثات، من الكازينو عالشالي للبيت

يعني مسافة الطريق مع شوية عجقة بيوصل عالبيت اللي بدو ياه  أصدي عالبودجيه!

وبيجعل سفرتو قائمه على المعجنات والمشاوي ولكن بيخبصا بالمشروب المفتوح على راسن العرق البلدي أكيد، ويسكي  ١٢سنه ونبيد معتق!! 

وبعكس الأخ اللي رح يسهر بالبيت، في مجموعة ما بترضى ولا بتقبل ع نفسا ولا بأي شكل إنو تسهر بالبيت لأنو لبرستيج ما بيسمحلا، ولو!!! ما هيي كيف بدا تجغل إدام النساوين، وهوي كيف بدو ينفخ بالسيجار مع جماعتو ويفطسو العالم تنيناتون بخبار وفخفخة عل فاضي؟؟ ما بصير الكافيار ما ينحكى عنو تاني نهار، بيزعل !!

أما الاشخاص اللي مواصيين عشاليه فمعظم الاوقات هالجماعة بينتورؤو من صاحب الشاليه، على أساس إنو "ولا يهمك مجهزه متل النار، فرن وشعلان"

 فجأة بعز السهرة والصقعة ما بتلاقي غير الشمنيه فحمة وأكلوا الضرب الجماعة وشو في أحلى من هيك طريقة  ليستقبل فيا السنة الجديده الواحد بالتعصيب وتكتكه سنانو بالصقعة... أحلى أجواء!  

بكل الاحوال الأهم من كل هول، الجمعة، فيا شباب ويا صبايا ويا كل اللي عم تعيدوا هالعيد، ينعاد عليكن وعلى أحبابكن بالصحة والعافيه ونشالله تكون ٢٠١٢ سنه خير وبركة علينا وعليكن .

ملاحظة : أد ما يكون في أكل عالطاولة، المقبلات بتضل الأطيب والأخف عالمعدة!

كاسكن!!!!! 

مغارة الغينه أكبر مغارة في لبنان والعالم

 دشن البطرك مار بشارة بطرس الراعي أكبر مغارة ميلادية في الغينه قضاء كسروان

وهي مرشحة لدخول موسوعة غينس للأرقام القياسيه نظراً لمساحتها البالغة ألف وخمسمائة متر مربع.

وهنا دعوة لجميع قراء هذا المقال لزيارة هذه المغارة التي تم بناؤها ليس بهدف دخول موسوعة غينس

 فحسب انما بهدف جمع ما يلزم لبناء كنيسة سانت ريتا في الغينه 

ساهموا في بناء الكنيسة وزوروا المغارة فقط بثلاثة ألف ليرة لبنانيه ! 

كل سنه وانتو بألف خير...

من وين ؟

من وين بدو يجي الرواق

و كل شي حولنا ما بينطاق

عجقة عالم وسيارات

بتمشي ما بتتنشق غير نفايات

خليك ببيتك مسترخي

ما تفكر تنزل ولا درجي

لا بالسيارة ولا بالدراجي

فيك توصل لتشتري سندويش فرنجي

 عروس زعتر وكباية شاي

ومن بعدها كباية ماي

فوت ع تختك وطفي الموبايل

بركي بتحس بشوية رواق!

صوت البحر

قلب البحر مليان أسرار

عن ناس ووجوه كتار

ما فيك تعرف شو اللي صار

وبداخل كل شخص شو في خبار

وحدو البحر بطمن الزعلان والمحتار

بصوت الموج بيعطي الإستقرار!

كل موجة وإلها نغمة

وكل نغمة جملة بتحكي

وكل جملة نصيحة بتعطي

لترجع عبيتك وع وجك ضحكي!

البحر ما تخاف تحدثوا

ولو كانت قوية موجاتو

قوي قلبك واقعد جنبوا

يمكن بهالحالي بدو مين يصغيلو!

ملاكاً مرشداً

جئت إلى منزلي خائفة

من أن تشرق الشمس وأنا تائهة

وإذ بملاك يطل من النافذة

يحضنني بأجنحته الواسعة

ويهديني سكوناً ووداعة

فأدركت أنه لم يكن لخوفي معناً

خاصةً وأن ملاكي كان حاضراً

فمهما كان الظلام داكناً

يبقى لعيوني نوراً

وأنت إن تهت يوماً

ورأيت أن الدنيا فقدت وهجاً

فانظر حولك مطمئناً

فإنك سترى ملاكاً مرشداً

أحلى شتويه بلبنان

فصل الشتي، اللي هوي من الفصول المليئة بالخير والبركه على جميع الصعد متل ترطيب الجو، ري المزروعات والحفاظ عالثروه المائية، بيحضر ع لبنان كل سنه و بيتحول لنقمه.

وهنا يطرح السؤال التالي: لماذا؟؟؟

لأنه يا عزيزي المواطن، الحق مش عالشتي ، الحق عالطرقات اللي عنا. هالطرقات اللي ما عم يعرفوا كيف يلاقولا طريقة باللتي هي أحسن لتسهيل جري المياه لأماكن نظيفة وخاليه من النفايات لما تسبب فيضانات وسيول، تأدي إنو يوصل علو الماء إلى متر !!!!!!

قليله!!!! كلمة بالتم متر؟؟؟ 

بهيدي الحالة يرجى من كافة المواطنين إحضار تياب السباحة والدواليب المائية ويرجى من شرطي البلدية أن يقوم بوظيفة مدرب السباحة والإشراف على سلامة المواطنين.

وهيك يمكن لكل محبي هالهوايه ممارستها على طرقات لبنان الفرعيه والعامه وشفطوا وفتلوا أد ما بدكن وفشر أصغر موتو يوصل أبلكن!!!

أكيد بدنا نقول لكل أصحاب الجت سكي والحسكه "الموسم رجع" استرزقوا!!

وما تنسوا يا أيها المواطنون تصوروا حالكون وتنزلو الصور فايس بوك للذكرى!!

ملاحظة: يرجى التقيد بتعليمات شرطي البلديه تفادياً لحوادث الغرق!!!!!!

كل شتويه وانتو بألف خير!!

بروح أو ما بروح؟

سئيلة الخبرية لما توقع بحيري

بين الروحة والمجيي، بتقول البيت بعدو أحلى مكان لأيّ  سهريي

منجي منقول رايحين

بيطلع المشوار لعين

منرجع منقرر نبقى، فجأة بتنقطع الكهربا!

شو العمل بهالحالي؟

روح عالفرشي وتطمش لما توعى ع صوت الورشي!

عمتم مساء!

القصة وما فيا / عند غيرو

القصة وما فيا إنو كنا عم نجرب من كل الميلات وكل المحاولات لناخد منها شي، طلع إنو القصة ما فيها شي!!!!

ما فيها شي إذا كنت ناصح!!

ما فيها شي إذا كنت بليد!!!

ما فيها شي إذا كنت حمار حسابات!!!!

ما فيها شي إذا بتتقبل حالك متل ما إنت !!!

يا عالم ، كل واحد في بداخلو " شي" شي حلو كتير !!!

ليه ما بتستفيدو من هالأشياء الحلوه اللي فيكن وبتنموا ويا انتو اللي بتنتقدو غيركن عالفاصله والنقطة روحوا شوفولكن شي جملة مفيدة تقروا، بركه بتزيدوا ثقافتكٌن أحسن ما تزيدو علينا ضجه وحكي بلا طعمه.

صاير كل واحد بهالدني مقيد بغيرو شو بدو يقول عنو أو عتلين هم غيرو شو بفكر عنو !!

ليش مين بكون غيرو؟؟ إبن مين هوي؟؟

ما يكون لأن معو قرشين زياده غيرو صار مالك الدني!!!!!

مين قال إنو غيرو أحسن من غيرو؟؟ ومين قال إنو غيرو ما ناقصو شي ؟؟

نبشو و فتشوا بيطلع أصل المشكل و القصة وما فيا عند غيرو!!

طالب زواج

غريبة أفكار بعض العالم و غريبة أطباعن!

السبب الغريب أنّو صار الزواج بأيّامنا كأن واحد عم بوصّي ع سيّارة موديل السّنة كاملة المواصفات سبور أو كلاسيك او ام عيون  و أهم شي يكون مصروفها حلو!

 شو هالظاهرة اللي ضاربة الوطن حاليا؟؟!! أنّو فجأة و من بعد فترة غياب طويلة, بحنّ الشبّ اللبناني للوطن و بيرجع ليتزوّج ابنة بلادو و ع شرط ما بايس تمها الاّ امّها!!

التوصاية عالعروس بتّم بعدّة طرق: عبر الأهل, الجريدة, الصديق أو سمسارة العرسان!

أوّل طريقة اللي هيّ الأهل, ممثّلة بالأم. بتشوف الأم ابنة الجيران أو حدا من صديقات ابنتها أو أي صبيّة بتلفتلا نظرها مهذّبة وابنة بيت و بتجرّب تحصل ع صورتها وتبعتها لأبنها المغترب لينقّي هوّي اللي بتعجبو لبس يوصل تكون العروس ناطرتو!

هوّي الصبي يقبر امّو, رح ينعجبو في بلا ما يشوفو لأن هوّي شيخ الشباب!!!

ما في لزوم يسألو رأيها للصبيّةّ

الوسيلة التانية هيّ عبر الجريدة, هون التفظيع!

العريس اللقطة بدّو العروس خارقة, فول أوبشيون(على لحظة رح يكتب مفيّمي مع فتحة بالسّقف!) بيبقى مفصّل قياسات كلوديا شيفر أو أجدد عارضة و منزّلن بالجريدة, مع الأتصال فورا, ما بعرف اذا عامل عرض خاص لأوّل اتصال.

منوصل للصديق الوفي!

الصديق العزيز بيجي بطريقة " أنا بعرّفك عليها ومن هونيك  و رايح اصطفل"

حلوي كتير هالجملة و معبّرة, أنّو أي اشكال هوّي بيتنازل عنّو, اذا كانت مبعوجة ولاّ مش معملاّ ميكانيك هوّي ما بيتحمّل مسؤوليّة!!

وبالآخر عنّا سمسارة العرسان! قليلة هالمخلوقة شو عم بتطلّع مصاري؟

بيجي العريس و بيطلب من هالسمسارة تلبقلو عروس طبعا حسب مواصفات معيّنة و اذا تم الوفاق يا لطيف شو بتربح مصاري بصيرو عم يتدّينو ليدفعولها!

يا جماعة, بقول المثل صدفة خير من ألف ميعاد!

... وألف اعلان! وألف طريقة لتدبير زواج!

بكل الأحوال الله يتمّم عخير و عاقبال العايزين!!!

ويليليليليليليليليليليليليليليليلي....

مقبّلات أو مقابلات؟

شوبيجمع هالكلمتين و شو اللي بفرّقن؟ هالألف اللي جايي قبل

الباء مغيّرة لفظ الكلمة ولكن بحديثي اللي واصلكن رح تعرفوا انوّ هالكلمتين بيفتحوا القابليّة!!!

يعني المقابلات اللي عملتن بعد ما تخرّجت, كانوا فعلا نوع من المقبّلات والميزة اللبنانيّة مع مشروب مفتوح كمان!

المقبّلات عادة بتشمل عدّة نكهات و مطيّبات بتستلذّ بكل وحدة منها حسب الذوق, مثلها مثل المقابلات اللي فيها افادة و منها اللي ما بتكون مصدّق كيف تفلّ من المطرح اللي انت في!

هيدي الحالة بكون فيا حرّ زيادة أو طعمتها مرّة

من بعد الميزة, بينزل السخن, هون انت بالمقابلة بتقول خلص هيدا هوّي المكان اللي لازم كون في ولكن بيتبيّنلك انّو انت غلطان لأن صاحب الشركة فاقع سكرة وراسو مطفي, حرام يكون واحد مثلو بهيك مركز!

امّا الحلوينة بآخر هالخبريّة ممكن بدل ما تتوفق بوظيفة, تتوفق بصاحب وظيفة, بتحاسبو صاحب المطعم و بتسربو سوا عالبيت أو عالوظيفة و هيك بتعيشو أحلى عيشة!!!

هيدي ميزتنا اللبنانيّة!!!!

ضيّعت الطريق

كم مرّة ضيّعت الطريق؟ اي عم بسألك انت اللي عم تقرا هيدا النص, كم مرّة  ضيّعت الطريق؟

طريق البيت أو طريق الجامعة أو الطرقات كلّها!!

انّو بصراحة حقّك! أنا مبارح كنت آطعة بطريق ما بها شي, عجقة سير ما فيها و اذ تاني نهار يا حرام شو صار فيها!

مبحشينا, مطحبشينا ما مخليين جريمة مش مرتكبينا فيا, بلا اذن و بلا دستور حكموا عليها و علينا انّو نضيّع الطريق!

يعني الطريق بحدّ ذاتها ما معها خبر شو صار فيها على كتر ما بحّشوها فقدت ذاكرتها نسيت كيف هجمو عليها و نكشوها, ضيّعت عقلها المخلوقة!

كان بدّها تقدّم شكوة بس ما عرفت ضدّ مين!

مثلها مثلنا, منعلّي الصوت و منحتجّ ومنسبّ و لكن ضدّ مين؟

ما كلّو مزفّت و محمي ومضمون الاّ الشعب المقهور!

ما ظاهر

 

ما ظاهر انّو العقل بهالأيام تطوّر و نضج ليعرف و يحلّل انّو مش كل شي بالمظاهر!!

بييجي واحد عم يشكيلك, بقلّك " غشّني الملعون( لما نقول غير كلمة)  شخص متلو متأقم و مرسّم هيك بيعمل؟"

 ايه خرجك, يا انت اللي نقّيت هيدا المتقّم المرسّم و انتقدت اللي جايي يتوظف عندك و لابس جينز عالأنترفيو

ليه شو بيه الجينز؟ ما يكون جايي مظلّط؟

لااااااا, عالأنترفيو لازم تجي مرّسم لأن هيدا أوّل انطباع, غشّوا للمعلّم و قلّو انت آدمي و مرتّب و بس تبلّش شغل نصّب عليه و خربلو بيتو و لو ما انت بدلتك حاميتك!

يا عيب الشوم عليكن و على عقلات أكبر مدير وظيفة بعدو بينغشّ و بيتأيّد بالتياب و بالشكل و بينسى أو بيتناسى  عقل و قدرات طالب وظيفة!

ابتسم....

                                              

ابتسم.... لقد حصلت على شهادة دراسات عليا في الاعلانات!!!

ايه لأ, ما تنبسط كتير ولا تعرّض واتّخن ابتسامتك أكتر, لأن بلبنان كلما تعلا شهادتك, كلما تنخفض نسبة حصولك على وظيفة محترمة الاّ, الاّ و بشدّد و بعيد وبأكّد على" الاّ" اذا في عندك دعمة خارجيّة أو واسطة!

شو حلوي كلمة واسطة, بتشيل الهم عن القلب!

يمكن انت ما بتعرف تكتب اسمك, مش مهم معك "واسطة"

يمكن انت بالأساس سنكري, مش مهم الواسطة بتعملك مدير بنك!

يمكن انت ما بدّك تشتغل ولكن بتحضر الواسطة ع باب بيتك, الك عين ما تقبلها؟ عيب مش من شيمك!!!

أمّا المواطن العادي اللي عايش عالبركة, بدّو ينطر الفرج يلتفتلو و يبشّرو بأحلى خبر!

بالزمانات كانوا يقولوا نيّال اللي عندو مرقد عنزة, هلّق صرنا نقول نيّال اللي عندو "واسطة"!

أنا صرت بالشهر الثالث, مخرّجة بالشهر الثالث, حاملة هالشهادة  وعم ببرم فيا, ما بعرف اذا لازم أنطر تسعة أشهر لتكتمل برمتي على كلّ الشركات الاعلانية بالبلد أو يمكن بشي عجيبة, بالشهر السابع, تفقش ميّة راس شي مدير واتوفّق بشي وظيفة شريفة!

 وبيسألو ليه هالشباب عم بهاجر؟

يا عمّي ما دام  الحدّ الأدنى ما عم يعرفو يتفقو عليه ولا حتى بالحوار بين بعضن سياسيينا الكرام عم يطلعوا بنتيجة.. الاّ, و هون منرجع ع بيت القصيد اذا كان في يد شقيقة أو صديقة أو ..... تدخّلت و مدّت يد المساعدة... ما يعرف بالوساطة الخارجية أو ما شابه ذلك!!!!  

هيدا لبنان, عايش ع هالكلمة بكافة تفرعاتها ومعانيها,  بدّك تبقى هون بدّك اتطحّل بايديك و اجريك  والشاطر بشطارتو, ما دام بيخلصو بنزيناتو الواحد ولا من يحزنون!

تصبحونا على أمل ايجاد وظيفة......