http://www.almustaqbal.com/PDFVersionv4.aspx?PDFType=asis&IssueNumber=4258&Pagenumber=9

الجمعة ١٧شباط ٢٠١٢، "ملاكاً مرشداً" كان في إحدى صفحات جريدة المستقبل 

مبعثاً من قبل "مقبلات بلوغ" زوروا  الموقع أعلاه. 

سلسلة خبريات سرفيسية ٣

اليوم منوصل للجزء التالت والأخير من سلسلة خبريات سرفيسية، وللي رح نحكي فيا عن النوع التاني من ركاب السرفيس اللي بضلو دابكينا مع الشوفير ومش عاجبن العجب والسبب لهالمشاكل إنو

 بيبقوا كتيرين حكي، بخلاء أو  منكوتين . إحضرو معي مقتطف من هالمشهد الصباحي... 

- مرحبا

-أهلا

 يييييييي ليك هيداااا...

إنو لأ  بس أنا ما فيي كتير بضايقو إنو ما بصير هيك إنو بدنا نام ، نرتاح إنو وين بروح لأرتاح  أنا شو بطلع عالجبل؟ لا بدي نام ببيتي ببيروت وينيي الدولة ما بطلقتن للموتويات تعملا شي حلة لا ما بقى فينا نتحمل...

فعلاً لا نحنا ولا إنتي، ما بقى فينا نتحمل، صوتك ونأك قبل الضو على فرد جمله،  إنو طوشتينا، يا محلى الموتو قدامك..

يعني هيدي المرأة من أول ما طلعت بالسيارة ما أطمت، دغري عالمرحبا قلع الموتور بلسانا، هالمسطرة من العالم اللي بتطلع بالسرفيس وبتلقلق حكي بلا طعمي، ياما في على شكلا مساطر من العالم بأعلى المراتب وبيبقى حكيا بأدنى المراتب، يعني لو كان في  مسطرة خشب كان سطر على تما الشوفير شي ١٠٠ ضربة بتسوى حياتها هيدا من عدا المسبات اللي لقمها ياهن من بعد ما نزلت، إيه توت تتتتتتتت...

بعصرنا الحديث صار السرفيس عم بقدم عروض خاصة ألا وهو تقسيط مريح يتم دفعها على طريقة سندات وبلا فائدة، هيدا العرض بس لزلمي بخيل اللي بشارع الشوفير على الليرة ، لأن هوي مقتنع إنو من بيروت للبقاع ٢٠٠٠ ل.ل بزيادة.

منوصل للمنكوت اللي بيبقى ما عاجبو شكل السيارة، ولا الشوفير، وبينجبر يقعد بالسيارة هوي ومأريف وبضل حامل معو قنينة سبيرتو للتطهير لمنع الميكروبات من التسرب إلى جسمو اللي كلو جراثيم...

ويلي بصير يطالب بالمكيف، والسيارة ماشيه عالمنيفال.

من بعد هالمشاهد الحية منلاحظ ليش شوفيرية السرفيس بيبقو منكوتين ببعض الأوقات وليش صايرين بيتكبرو علينا على حيلا مطرح بدنا نرحلو وصايرين عم بشارطونا عالكيلومتر، من بعد ما كانوا يترجونا نطلع معن ويزيزقولنا دينينا

بزمورن، راحت هيديك الأيام وصار الشوفير خواجة وصار هوي ينقي وين بدو يروح ومين بدو يطلع معو.. لأن بإلك "مش من توفي معنا، أنا بدي إنزل من هايدا المفرق انزلي هون ما بدي فوت بالعجقة إلا إذا بتدفعي ٥٠٠٠ من كعب الأشرفية عالأشرفية الساحة"

أنا: "لا معلي بنزل هون بكفي مشي "

ما تفكروا تقولولي طلعي باص لأن مشي بوصل أسرع...