أبو شبكة

معلم "أبو شبكة" منو بيو لشبكة ولا حفيده، وأيضاً منو صاحب محلات أبو شبكة للألعاب. انما هوي من مؤسسي شبكة الصيادين (من نوع أخر) المحتريفين القلة بالوطن العربي نظراً للخبرة ونوعية العمل  المبدع والخلاق.

أبو شبكة قدر يصنع إسم متميز وبيشبهو نظراً لشطارتو بالشغل اللي بيعتمد على صيد الأدمغة واللعب عالمشاعر وعواطف الشخص مثلاً :

شو أعز من الأولاد على قلب الأهل ؟؟

يعني مش حرام هالأولاد ما تجمعلن قرشين نضاف ع جنب من هلق لكانوا صارو بالجامعة ؟ ما حدا بيعرف شو بصير معو """"""لا سمح الله" أكيد، بس هيك بطمن بالك، ولادك مأمنين ....

هون بيحمر البي وبيخضر وبصير خايفان يرجع ع بيتو ويقوم  يصرلو شي وما أمن ع ولادو بقرشين نضاف عجنب، فبيلعب الفار براسو وما بتلاقي غير نزل أمواله عالطاوله كأن هم ونزل عن كتفو !

هيدا من الناحية الإجتماعية أما من الناحيه التجغيلية، معقول شاب طول وعرض عز وجاه  ما يكون مأمن عالفيراري  متل ما مأمن ع حياتو ؟ عيب !

شو رح تفكر رفيقة هيدا الشاب عنو ؟ أكيد إنو مش عالموضة وماخرجو فيراري !  

أعمال أبو شبكة ما خلصت هون انما هوي قادر يقنع بنت وزنها ٢٠٠ كيلو  بأن تأكل وتكتر شوكولا أد ما فيا وتمتنع عن أكل كل ما هوي دايت وبقلا وبكل ثقة " شوفي كيف رح تضعفي "

وما بتصدقو إذا بقلكن إنو البنت رح تقتنع منو وتنفذ هالوصفه السريه والكتير دايت وخاليه من السعرات الحرارية فقط عند الريس "أبو شبكة" 

أبو شبكة قادر  يتقمص عدة شخصيات ويشتغل عدة مهن ويعيشك قصة هوليوودية ويعملك جولة حول العالم هوي وقاعد ورا مكتبو، هالشطارة كلا وضمن مقابلة خاصة معو بقول "أبو شبكة" إنو اجت بالفطرة وأكيد الخبرة بتلعب دورا وحقا مصاري.

مما لا شك في، كل مهنة وإلها أسرارها، أما أسرار  مهنة أبو شبكة مأخودة من تم السمكة مباشرة إلى المستهلك أي إلى كل من يقترب من شباك هذا المخلوق العجيب !