سلسلة خبريات سرفيسية

هالفترة رح تابعوا بمقبلات سلسلة مقالات عن السرفيس  وخباروا ومغامرات المواطن اللبناني اللي بيستعمل السرفيس كوسيلة نقل!

لأن السرفيس مهم ومؤثر وفعال وين ما كان بالعالم وأكيد كل بلد إلو قوانينو وأنواع سيارات ونمر خصوصية بتختلف عن غير بلدان بس عالأكيد ما في متل لبنان !

كبداية رح نحكي ونعرف عن شوفيرية السرفيسات بلبنان، أطباعن وشخصيتن عامةً!

كلنا منعرف شوفيرية السرفيس اديه عندن شخصية مميزة إن من خلال شكلن، سواقاتن أو حكين!!

إجمالاً شوفيرية السرفيس أغلبن بيبقوا كبار بالعمر، عندن شوارب مفتولين وفخورين بتربايتن إذ هني رمز الرجولي ولكن اصفروا عن جوانبن من ورا قرمية السيجارة اللي ما بتطلع من تمو طول ما هوي عم بسرفس !

أما الشوفيرية الجونيور بيبقو مطولين شعراتن أو دقنن إنو بركي يتلاقى بشي صبية ع طريق !!!!! 

هيدا من ناحية الشكل، أما من ناحية السواقة فهون الإبداع.

عندك المذوق اللي بوصلك دغري  على المكان اللي إنت رايحلو وعندك اللي بيعملك جولة سياحية عبر الأراضي اللبنانية المحررة واللي بعد ما تحررت أي مزارع شبعا!

وفي اللي بنتعلك معدتك قبل الضو من ورا فراماتو أما النوع التاني فبمرضك لأن بكون بدو مين يدفشو من ورا  ليمشي.

أما بالمحادثات، إيه حدث ولا حرج !

من مقومات رجل السرفيس إنو يكون لسانو نظيف يعني بالزنار ونازل هاي أنضف شي عندو !

كما وإنو شوفير السرفيس معلق ممتاز على جميع الأصعدة الفنية، السياسية والإجتماعية، هوي ناقد ذو نظرة ثاقبة يعني بيلقطا عالطاير وسترجي تقول لأ !

لأن هوي متابع كل الأخبار عبر أثير موجة اذاعيه ضاربها البرازيت بالسيارة بس هوي وحدو قادر يفهم ويستوعب لأن بيملك قدرات خارقة غير موجودة عند أي شخص منو شوفير سرفيس !

وبصير بدو يعيشك الأجواء وإنت ما همك غير توصل !

 كما هو معروف السرفيس بدو ركاب لتكمل الأجواء .... تفاصيل بمقال لاحق!

يسلمو ...!