لسان مزور

الكلمة الحلوة، حلوة كتير والتصرف المهذب والأخلاقي أحلى وأحلى ولكن شو بصير لما بزيدو هالمواصفات عند حدن؟ شو بيتسمو هالأشياء لما بتصير عم بتشوف قدامك شي فوق الطبيعة..؟!

مثلا الكلمة الحلوة المضروبة والملغومة بطن من دبس الرمان وكل أنواع السكريات مع القشطة والعسل أوووو ف حلي قلبكن وحسيتو إنو لبد السكر ع معدتكن فرد مرة وبدل ما تخجلو 

أو تستحو من هالكلمة أو الغزل أو اللي هوي، قلتو  أوووو ف شو دلع هالحكي وأبصر شو في من ورا... 

فعلاً التبييض والحكي الملغوم اللي ما معروف شو أصلو نازل بقوة عالأسوق والساحات وخرق البيوت والأعمال وللأسف صرنا نشك بأي شخص حتى لو نيتو صافية!

بيتلقط فيك البائع بالسوق وما بعود يفلتك من عندو بدو يبيعك مش عارف كيف، بصير مش عارف بشو بدو يمدح بمحلو وبضاعتو أو بشكلك وزوقك واختيارك الراقي للألبسة والأحذية

وشي بتبرم ضهرك بتطلع واحد نوري "بنظرو أكيد "

أما بما يختص بالأعمال والإدارة فهون الضحك عالدقون. بيوصل صاحب الأموال الطائلة وبيتفركشو في كل الموظفين من ماسح القزاز، يليه معلم القهوي مروراً بالمضيفين وصولاً إلى المدير العام اللي بكون قصداً حاطت

هالإستقبلات  لهالشخصية الفريدة من نوعا اللي بينشغل فيا للحظات بهدف تلبية طموحاتو المالية  ومن بعد هالعرض المسرحي ومن بعد ما يكون حصل على هدفو بكون تعليقو "انشالله بيفطس "

ما بينتبه الواحد هوي وعم يحكي حكي معسووووووووووول وبأمرك سيدنا، اللي بدك بصير و "أنا ممسحة بين ايديك" ع شوي، اديه بكون عم بصغر من حجمو بس ليوصل لكم قرش ببيع فيون كرامتو وبعبي براس كم واحد مصدق حالو إنو هوي شي وهوي ما شي، هيدا اللي بوصلنا للطبقية والإستبداد بالمجتمع.   

  

بهالحالة صار لازم ينعمل مكنة جديدة لكشف "اللسان المزور" ورفض إستقبالو بالمجتمع متلو متل أي عملة مزورة مصيرها الزوال!